19 Gusht 2026, 18:02
Nënkryetari i PD, Belind Këlliçi ka reaguar përmes një statusi në Facebook lidhur me dy ngjarjet e fundit kriminale të ndodhura në Sarandë dhe Ksamil. Këlliçi shkruan se në të dyja rastet, efektivë të policisë kanë rezultuar të përfshirë, jo në funksion të garantimit të rendit dhe sigurisë, por si palë në ngjarje.
Në vijim të reagimit, Këlliçi akuzon qeverinë e Edi Ramës për përgjegjësi politike për gjendjen e krijuar në Policinë e Shtetit dhe përmend edhe hetime e përgjime të autoriteteve franceze dhe belge, të cilat, sipas tij, kanë nxjerrë në pah lidhje mes grupeve kriminale dhe strukturave të policisë.
Më të rënda, sipas tij, janë zhvillimet në Ksamil, ku një turist 20-vjeçar portugez humbi jetën në hotel “Principotes” pasi u godit me thikë nga një prej punonjësve. Këlliçi pretendon se autori i dyshuar, me precedent kriminal, ishte i punësuar në një biznes të një personi me probleme me ligjin dhe kishte si koleg një efektiv policie, i cili, sipas tij, dyshohet se ka ndihmuar në krim dhe arratisje. Pronar i “Principotes” është 36-vjeçari Bekim Bulica i cili vijon të jetë në kërkim policor.
Reagimi:
Edhe krimineli edhe oficeri në të njëjtën bordero!
Dy ngjarje njëra pas tjetrës, në Sarandë e në Ksamil, na tregojnë një anë të errrët të policisë, krejt tjetër nga ajo që propagandon Ministri dhe Kryeministri.
Në dy ambjentet ku ndodhën ngjarje kriminale, rezultuan efektivë të policisë të përfshirë. Jo të përfshirë për të vendosur rendin e garantuar jetën e qytetatrëve, dhe sigurinë fizike. Të përfshirë si palë.
Në Sarandë gati gati patëm një përballje mes policive. Ata që përfaqësonin klubin privat, ishin oficerë që punonin aty part time, ose në sezon si me thënë. Dhe nga ana tjetër, ata të rendit që përfaqësonin komisariatin.
Më e rënda është në Ksamil, me viktimë një turist 20 vjeçar portugez.
Autori një person me precedent kriminal, ishte i punësuar në biznesin e një njeriu problematik dhe kishte koleg një oficer policie që dyshohet se ka ndihmuar në krim dhe në arratisje.
Edhe oficeri edhe krimineli të dy të punësuar dhe në të njëjtin vend. Në të njëjtën bordero.
Kjo bashkëjetesë mes atyre që duhet të garantojnë ligjin dhe atyre që janë subjekt i punës së tyre, është tronditëse dhe rezulton e shtrirë në çdo nivel.
Nuk ka asnjë dyshim se këta badigardë privatë që kryejnë krime dhe oficerë që janë betuar për të shërbyer ligjin, punojnë sëbashku në shumë lokale, club-e dhe ambjente të tjera të frekuentuara në gjithë vendin. Është një skemë e përhapur.
Ne i dimë tanimë lidhjet dhe inkriminimin e policisë në kupolën e saj me bandat. Përgjimet që kanë sjellë autoritetet franceze e belge tregojnë se si grupet e fuqishme kriminale kanë ndikuar në emërime të shefave të komisariateve e drejtorëve.
Por rastet e ditëve të fundit po tregojnë se kjo simbiozë është e shtrirë në mënyrë pandemike dhe në terren.
Çka tregon për një sëmundje të rëndë në indin kryesor të shtetit, atë të policisë.
Në këtë nivel alarmant, gjendja erdhi pas 13 viteve pushtet të Edi Ramës, i cili bandat dhe grupet kriminale i ka pasur vazhdimisht shtabet e tij elektorale. Duhet një përmbysje totale për të shkulur këtë inkriminim dhe bashkëjetesë të krimit, të të fortëve me oficerët e shkolluar, të betuar dhe të paguar nga taksat tona për të zbatuar ligjin.
19 Gusht 2026, 12:58
Deputeti i Partisë Demokratike, Luciano Boçi, ka kundërshtuar propozimin për reduktimin e numrit të bashkive në 46, duke argumentuar se një hartë e tillë do ta largonte më tej pushtetin vendor nga qytetarët.
Në një deklaratë për reformën territoriale, Boçi thekson se debati nuk duhet të përqendrohet vetëm te numri i bashkive, por te pyetja se cila ndarje territoriale u shërben më mirë qytetarëve.
Sipas tij, bashkitë më të mëdha rrisin distancën mes qytetarit dhe vendimmarrjes, ndërsa zonat periferike rrezikojnë të marrin më pak vëmendje dhe investime.
“Me 46 bashki krijohen më shumë periferi dhe më pak qendra. Kjo është dobësia kryesore e këtij propozimi. Shqipëria nuk ka nevojë për bashki gjithnjë e më të mëdha. Ka nevojë për bashki që funksionojnë”, shprehet Boçi.
Ai sjell si shembuj rastet e Tepelenës me Memaliajn, Fushë-Arrëzit me Pukën dhe Librazhdit me Prrenjasin, duke i cilësuar bashkime të tilla të papërshtatshme. Boçi kundërshton gjithashtu përthithjen e bashkive që, sipas tij, kanë performancë më të mirë nga bashki më të mëdha, duke përmendur Dimalin, Selenicën, Patosin dhe Maliqin.
Deputeti demokrat argumenton se Shqipëria ka nevojë për një hartë me rreth 100 bashki, jo për të rritur administratën, por për ta afruar pushtetin me komunitetet.
“Me 46 bashki rrezikojmë të krijojmë kryetarë territoresh. Me rreth 100 bashki synojmë të kemi kryetarë komunitetesh”, deklaron ai.
Boçi e lidh reformën territoriale edhe me problematikën e shpopullimit. Sipas tij, bashkimi i qyteteve të vogla dhe humbja e institucioneve lokale mund të përshpejtojë largimin e banorëve, duke krijuar një cikël ku shpopullimi përdoret më pas si argument për bashkime të tjera territoriale.
“Kur një qyteti i heq institucionet, administratën dhe vendimmarrjen, i heq pak nga pak edhe arsyet për të qëndruar aty”, shprehet Boçi.
Duke iu referuar argumentit të kursimit, deputeti i PD-së thotë se reduktimi i strukturave administrative nuk duhet të bëhet në kurriz të qytetarëve. Sipas tij, nëse banorët duhet të udhëtojnë më larg për të marrë shërbime apo nëse investimet dhe reagimi ndaj problemeve ngadalësohen, kostoja thjesht transferohet nga shteti te qytetari.
Boçi e konsideron reformën territoriale edhe një çështje të demokracisë vendore, duke argumentuar se njësitë administrative nuk mund të zëvendësojnë bashkitë dhe administratorët e emëruar nuk mund të zëvendësojnë drejtuesit e zgjedhur.
Në këtë kuadër, ai rendit disa prej objektivave të projektit të PD-së, ndër të cilat afrimi i vendimmarrjes me komunitetin, rritja e llogaridhënies së drejtuesve vendorë, shkurtimi i distancave për marrjen e shërbimeve, ruajtja e identitetit të komuniteteve, nxitja e investimeve dhe rritja e pjesëmarrjes qytetare.
Sipas Boçit, një model me rreth 100 bashki mund të shoqërohet me administrata më të vogla, shërbime të përbashkëta mes bashkive, digjitalizim dhe kontroll më të fortë financiar, pa cenuar përfaqësimin lokal.
Në përfundim, deputeti demokrat e përmbledh qëndrimin e PD-së me një parim: “Jo qytetari të shkojë pas bashkisë. Bashkia duhet të shkojë te qytetari.”
Sipas tij, ndarja me rreth 100 bashki nuk është thjesht një zgjedhje numerike, por një “zgjedhje demokratike”.
19 Gusht 2026, 12:40
Procedohen në gjendje të lirë 28 shtetas të mitur, të moshave 13–17 vjeç, disa prej të cilëve u kapën duke mbajtur armë të ftohta dhe mjete të mprehta.
Sekuestrohen 5 armë të ftohta/mjete të mprehta, si dhe sende të tjera të gjetura gjatë kontrollit fizik.
Shërbimet e Komisariatit të Policisë Nr. 6, në bashkëpunim me shërbimet e Forcës së Posaçme “Shqiponja”, pas marrjes së informacionit në rrugë operative se disa grupe të miturish do të konfliktoheshin me njëri-tjetrin në zonën e Kombinatit, organizuan menjëherë punën dhe ndërhynë për parandalimin e përshkallëzimit të situatës.
Në bazë të informacionit të marrë, shërbimet e Policisë lokalizuan në rrugën “Llambi Bonata” disa të mitur, të ndarë në grupe, të cilët dyshohej se do të përfshiheshin në një konflikt. Policia ndërhyri menjëherë dhe i shoqëroi ata në ambientet e Komisariatit të Policisë Nr. 6.
Gjatë kontrollit fizik, disa prej të miturve iu gjetën thika, kaçavida, maska dhe sende të tjera, të cilat u sekuestruan në cilësinë e provës materiale.
Veprimet procedurale me të miturit u kryen në prani të prindërve dhe psikologëve. Pas komunikimit me prokurorin, nisi procedimi në gjendje të lirë për 28 shtetas të mitur, të moshave 13–17 vjeç.
Materialet procedurale iu referuan Prokurorisë për veprime të mëtejshme.
19 Gusht 2026, 11:44
Irani po shqyrton mundësinë e sulmeve ndaj objektivave ushtarake amerikane në Evropë, në rast se presidenti amerikan Donald Trump vendos të përshkallëzojë konfliktin.
Sipas një raportimi të Financial Times, që citon persona pranë regjimit iranian, forcat e Teheranit kanë vlerësuar skenarë për goditjen e aseteve amerikane në Evropën Juglindore.
Mes objektivave të mundshëm përmendet Bullgaria, e cila muajin e kaluar miratoi përdorimin e bazës ajrore Bezmer për furnizimin me karburant të avionëve amerikanë.
Në listën e objektivave të mundshme përmendet edhe Qiproja. Në mars, një bazë ajrore britanike në ishull u godit nga një dron, ndërsa tashmë ajo shihet si një prej pikave që mund të përfshihen në një përgjigje iraniane në rast të një ofensive të re amerikane.
Burimet e cituara nga Financial Times bëjnë me dije gjithashtu se forcat iraniane kanë shqyrtuar mundësinë e goditjes së kabllove nënujore të fibrave optike në zonën e Ngushticës së Hormuzit, nëse konflikti do të përshkallëzohej.
Sipas gazetës, këto kërcënime pasqyrojnë klimën në Teheran, ku një pjesë e regjimit e konsideron gjithnjë e më të mundshëm rikthimin e konfliktit.
Korpusi i Gardës Revolucionare Islamike dhe zyrtarë të tjerë ushtarakë iranianë kanë paralajmëruar se, në rast të një lufte të re në shkallë të gjerë, Teherani mund të zgjerojë objektivat përtej goditjeve ndaj forcave amerikane, infrastrukturës energjetike dhe bazave në Lindjen e Mesme.
Garda Revolucionare ka paralajmëruar edhe Mbretërinë e Bashkuar për përdorimin e bazave të saj nga forcat amerikane, duke deklaruar se çdo bazë që përdoret për nisjen e sulmeve ndaj territorit iranian do të konsiderohet objektiv legjitim.
19 Gusht 2026, 11:02
Ish-ministri ukrainas i Mbrojtjes, Mykhailo Fedorov, i shkarkuar vetëm një muaj më parë nga presidenti Volodymyr Zelenskyy, i është drejtuar qytetarëve ukrainas përmes një video-mesazhi, duke bërë thirrje për gjetjen e një mekanizmi që do të mundësonte zhvillimin e zgjedhjeve edhe gjatë luftës.
Fedorov, shkarkimi i të cilit shkaktoi protesta nga mbështetësit e tij, kritikoi korrupsionin gjatë kohës së luftës dhe paralajmëroi për një krizë sistemike të qeverisjes në vend.
“Demokracia nuk mund të mbahet peng nga Rusia. Ne po luftojmë pikërisht sepse duam të mbetemi një shtet i lirë evropian”, deklaroi Fedorov.
Ai kërkoi krijimin e një mekanizmi ligjor, të sigurt dhe realist që do t’i mundësonte Ukrainës të rikthente procesin demokratik edhe në kushtet e një lufte të zgjatur.
Sipas tij, duhet të garantohet e drejta e votës për ushtarakët, për miliona ukrainas që ndodhen jashtë vendit dhe për qytetarët që jetojnë në zonat pranë vijës së frontit. Fedorov theksoi gjithashtu nevojën për sigurinë e procesit zgjedhor, pavarësinë e institucioneve dhe besueshmërinë e rezultatit.
Komentet e ish-ministrit mund të shtojnë presionin ndaj Zelenskyt, i cili është përballur me skandale korrupsioni dhe kritika lidhur me disa vendime të fundit për emërime dhe shkarkime.
Zelenskyy u zgjodh president në vitin 2019 për një mandat pesëvjeçar. Megjithatë, zgjedhjet nuk janë zhvilluar që nga nisja e pushtimit në shkallë të gjerë nga Rusia në shkurt të vitit 2022, pasi në Ukrainë vijon të jetë në fuqi ligji ushtarak.
