31 Gusht 2026, 13:43
Ish-futbollisti i Kombëtares shqiptare, Igli Tare, është paraqitur këtë të hënë, më 31 gusht, në Prokurorinë e Posaçme (SPAK), në kuadër të hetimeve të dosjes “Balluku”.
Tare ka qëndruar për rreth tre orë në ambientet e SPAK-ut, ku raportohet se ka dhënë shpjegime para prokurorëve lidhur me çështjen që po hetohet.
Pas përfundimit të dëshmisë, Tare ka dalë nga ambientet e Prokurorisë së Posaçme dhe është përballur me gazetarët që e prisnin jashtë. Ish-futbollisti nuk ka dhënë detaje rreth përmbajtjes së deklarimeve të tij, duke u shprehur shkurt: “Falënderoj mediat për mënyrën si e kanë transmetuar”.
Hetimi për pastrim parash
Igli Tare është nën hetim për veprën penale të pastrimit të parave, ndërsa emri i tij është përfshirë në hetimet që lidhen me dosjen “Balluku”. Në fokus të SPAK-ut raportohet se është një vilë në zonën e Dhërmiut, që dyshohet se balluku e ka regjistruar në emër të tij. Prokurorët po verifikojnë rrethanat e pronësisë së saj, transaksionet financiare dhe lidhjet e mundshme me persona të tjerë që janë pjesë e hetimit.
Në kuadër të së njëjtës dosje, më herët është marrë në pyetje edhe vëllai i Igli Tares, Agron Tare.
Hetimet vijojnë, ndërsa SPAK po verifikon elementët financiarë dhe pasurorë që lidhen me personat e përfshirë në dosje.
31 Gusht 2026, 13:20
Bekim Sejdiu ka konfirmuar se ka pranuar propozimin për të kandiduar për president të Republikës së Kosovës, pasi Lëvizja Vetëvendosje dhe Lidhja Demokratike e Kosovës kanë arritur pajtim për emrin e tij.
Ish-gjyqtari i Gjykatës Kushtetuese Bekim Sejdiu e ka cilësuar si nder besimin e dhënë nga përfaqësuesit e dy subjekteve politike, duke theksuar se do të kandidojë si figurë jo-partiake.
“Dy partitë kanë arritur pajtueshmëri për emrin tim. Kjo më bën të nderuar besimi që më kanë dhënë përfaqësuesit e dy partive”, ka deklaruar Sejdiu.
Ai ka bërë të ditur se fillimisht synimet e tij profesionale kanë qenë të përqendruara kryesisht në fushën akademike, por ka vendosur ta pranojë propozimin për postin e presidentit, duke marrë parasysh përgjegjësinë që bart kjo pozitë dhe rrethanat aktuale politike në vend.
“E kam pranuar këtë propozim ndonëse ambicia ime ka qenë më shumë në fushat akademike, por duke qenë i vetëdijshëm edhe me barrën e përgjegjësisë që sjell posti i presidentit dhe me kontekstin aktual politik të Kosovës, jam vënë në shërbim të shtetit dhe qytetarëve tanë”, është shprehur ai.
Sejdiu është zotuar se përgjegjësinë që i është besuar do ta ushtrojë me përkushtim, duke nënvizuar rëndësinë e pozitës së presidentit në funksionimin institucional të vendit.
Ai ka theksuar gjithashtu se zgjedhja e presidentit përfshin si dakordimin politik ndërmjet subjekteve, ashtu edhe respektimin e procedurave të përcaktuara me Kushtetutë dhe që zhvillohen në Kuvendin e Kosovës.
Kandidatura e Bekim Sejdiut pritet të kalojë nëpër procedurat parlamentare për zgjedhjen e presidentit të Republikës së Kosovës.
Kush është Bekim Sejdiu?
Bekim Sejdiu, i lindur në vitin 1974, ka një karrierë të gjatë në diplomaci dhe drejtësi.
Ai ka shërbyer si gjyqtar i Gjykatës Kushtetuese të Kosovës, ndërsa më herët ka mbajtur disa pozita në shërbimin diplomatik të vendit.
Sejdiu ka qenë ambasador i Kosovës në Turqi gjatë periudhës 2008–2012, ndërsa nga viti 2012 deri më 2014 ka shërbyer si Konsull i Përgjithshëm i Kosovës në Nju-Jork.
Para emërimit si ambasador, ai ka shërbyer edhe si këshilltar politik në kabinetin e ministrit të parë të Ministrisë së Punëve të Jashtme të Republikës së Kosovës.
29 Gusht 2026, 12:40
Islanda po zhvillon këtë të shtunë, më 29 gusht 2026, një referendum kombëtar për të vendosur nëse vendi duhet të rifillojë negociatat për anëtarësim në Bashkimin Evropian, 13 vjet pasi procesi u pezullua.
Pyetja që u është drejtuar qytetarëve është e drejtpërdrejtë: “A duhet që Islanda të rifillojë negociatat e aderimit me Bashkimin Evropian?”
Rreth 265 mijë islandezë me të drejtë vote pritet t’u drejtohen qendrave të votimit për të shprehur qëndrimin e tyre mbi një çështje që ka rikthyer në qendër të debatit të ardhmen e marrëdhënieve të Islandës me BE-në. Referendumi është këshillimor dhe është organizuar nga qeveria e re e koalicionit, e udhëhequr nga Aleanca Social-Demokrate pro-BE. Rezultati pritet të përcaktojë nëse Reykjaviku do të kërkojë rikthimin në tryezën e negociatave me Brukselin.
Një proces i ngrirë që prej vitit 2013
Islanda aplikoi zyrtarisht për anëtarësim në Bashkimin Evropian në vitin 2009, në kulmin e pasojave të krizës financiare globale që goditi rëndë ekonominë islandeze.
Negociatat nisën më pas, por procesi u ndërpre në vitin 2013, pas ardhjes në pushtet të një qeverie euroskeptike. Dy vite më vonë, në 2015, Islanda njoftoi se nuk dëshironte të konsiderohej më si vend kandidat për anëtarësim.
Megjithatë, aplikimi nuk u tërhoq formalisht në aspektin ligjor. Rikthimi i mundshëm në negociata nuk do të nënkuptonte nisjen e procesit nga zero. Para pezullimit, Islanda kishte hapur 27 nga 35 kapitujt e negociatave dhe kishte mbyllur përkohësisht 11 prej tyre.
Çfarë ndodh nëse fiton “PO”?
Nëse shumica voton pro rifillimit të negociatave, qeveria islandeze do të marrë një mandat politik për të rikthyer bisedimet me Bashkimin Evropian.
Megjithatë, vota e 29 gushtit nuk do të nënkuptonte automatikisht anëtarësimin e Islandës në BE.
Një marrëveshje përfundimtare do të duhej të kalonte në një referendum të dytë, të miratohej nga parlamenti islandez dhe më pas të ratifikohej nga të gjitha 27 shtetet anëtare të Bashkimit Evropian.
Në rast të një vote “JO”, çështja e anëtarësimit pritet të lihet sërish mënjanë për një periudhë të gjatë.
Pse çështja është rikthyer në vëmendje?
Debati për anëtarësimin në BE është rikthyer fuqishëm në Islandë në një moment kur peizazhi gjeopolitik evropian ka ndryshuar ndjeshëm.
Pushtimi rus i Ukrainës, tensionet e reja të sigurisë dhe rëndësia strategjike në rritje e rajonit të Arktikut kanë nxitur diskutimet mbi lidhjet e Islandës me Evropën.
Islanda është tashmë pjesë e Zonës Ekonomike Evropiane dhe e zonës Schengen, çka do të thotë se vendi është i integruar ngushtë me tregun dhe hapësirën evropiane.
Pikërisht kjo gjendje mund ta bëjë procesin e negociatave më të shpejtë krahasuar me vendet që nisin nga një fazë shumë më e hershme e përafrimit me legjislacionin e BE-së.
Sipas vlerësimeve të bëra nga zyrtarë evropianë, nëse negociatat do të rifillonin, ato mund të përfundonin brenda 18 deri në 24 muaj, duke hapur mundësinë për një anëtarësim rreth vitit 2028.
Një garë e ngushtë në sondazhe
Përpara referendumit, sondazhet kanë treguar një garë të ngushtë mes mbështetësve të “PO”-së dhe “JO”-së.
Diferenca minimale mes dy kampeve e bën rezultatin veçanërisht të rëndësishëm për të ardhmen e politikës së jashtme dhe evropiane të Islandës.
Nëse qytetarët votojnë pro, Reykjaviku mund të rikthehet në tryezën e negociatave me Brukselin pas më shumë se një dekade pezullimi.
Kështu, votimi i 29 gushtit nuk vendos drejtpërdrejt nëse Islanda do të bëhet anëtare e Bashkimit Evropian, por përcakton nëse vendi do të hapë një kapitull të ri në rrugëtimin e tij drejt BE-së.
29 Gusht 2026, 12:37
Ish-zyrtari i lartë i Policisë së Shtetit, Uljan Shpataraku, është përballur këtë të shtunë me Gjykatën e Posaçme për caktimin e masës së sigurimit.
Pas seancës, gjykata ka vendosur ndaj Shpatarakut masën e sigurisë “arrest në burg”. Ai akuzohet për veprën penale të përkrahjes së autorit të krimit.
Shpataraku u arrestua nga autoritetet teksa drejtonte automjetin me të cilin udhëtonte Ergys Agasi, person i shpallur në kërkim nga drejtësia. Sipas hetimeve, ish-zyrtari i Policisë dyshohet se ka ndihmuar Agasin, duke e transportuar me automjet, çka ka çuar në ngritjen e akuzës për përkrahje të autorit të krimit.
Vendimi i Gjykatës së Posaçme për masën e sigurisë vjen në kuadër të hetimeve që po zhvillohen lidhur me personat e përfshirë në çështjen e Ergys Agasit.
29 Gusht 2026, 12:17
Sot shënohet dita e 91-të e protestës qytetare kundër qeverisë dhe kryeministrit Edi Rama. Qytetarët vijojnë të mblidhen në Tiranë, duke kërkuar dorëheqjen e kryeministrit dhe ndryshimin e sistemit politik.
Protesta vjen pas 90 ditësh mobilizimi të njëpasnjëshëm, gjatë të cilave protestuesit kanë marshuar nga sheshi “Skënderbej” drejt Kryeministrisë, duke përcjellë mesazhe kundër qeverisë.
Kërkesa kryesore e protestuesve mbetet largimi i Edi Ramës. Në platformën e tyre kërkohet gjithashtu krijimi i një qeverie tranzitore me mandat 12-mujor dhe ndryshimi i kursit politik të vendit.
Gjatë protestës së mbrëmshme, qytetarët marshuan në rrugët e kryeqytetit me thirrje kundër qeverisë dhe kryeministrit, duke deklaruar se nuk do të tërhiqen deri në plotësimin e kërkesave të tyre.
Dje në ditën e 90-të, protestuesit e cilësuan lëvizjen si një revoltë qytetare kundër klasës së vjetër politike. Përmes pankartave u përcoll edhe mesazhi “90 ditë, një kërkesë: llogaridhënie”, ndërsa organizatorët paralajmëruan vijimin e protestave.
Edhe sot, në ditën e 91-të, qytetarët pritet të mblidhen në shesh dhe të marshojnë në rrugët e Tiranës, duke kërkuar që presioni qytetar të vijojë deri në një ndryshim politik.
Ndërkohë, për 12 shtatorin është paralajmëruar një protestë kombëtare, ku pritet t’i bashkohet lëvizjes edhe Diaspora.
