26 Gusht 2026, 20:09
Arrestimi i Ergys Agasit
Tetë muaj pasi ishte shpallur në kërkim nga SPAK në kuadër të hetimeve për abuzimet e dyshuara me tenderët e AKSHI-t, Ergys Agasi është arrestuar pasditen e sotme në Durrës.
Agasi u pikas nga policia që në Elbasan teksa lëvizte me një automjet tip “Audi” luksoz. Operacioni u zhvillua nga Policia e Durrësit në bashkëpunim me strukturat e SPAK-ut.
Sipas të dhënave paraprake, ndjekja ka vijuar për rreth 40 kilometra. Mjeti ka përshkuar aksin Elbasan-Peqin-Rrogozhinë dhe më pas ka vijuar drejt Durrësit. Ndërhyrja e forcave të policisë është bërë në zonën e Plepave, ku automjeti është rrethuar dhe Agasi është arrestuar.
Pamjet tregojnë momentin kur efektivët ndërhyjnë ndaj Agasit. Në momentin e arrestimit, ai ishte i veshur në mënyrë sportive, me një bluzë të bardhë, pantallona të shkurtra të zeza, orë të bardhë luksoze dhe shapka.
Në makinë ishte edhe ish-zyrtari i Policisë së Elbasanit
Në automjet bashkë me Ergys Agasin ndodhej edhe Ulian Shpataraku, i cili ishte në drejtimin e mjetit.
Shpataraku, ish-zëvendësdrejtor i Policisë së Elbasanit, ishte gjithashtu person i shpallur në kërkim. Ai është arrestuar në flagrancë, pasi dyshohet se ka shoqëruar dhe ndihmuar Agasin gjatë kohës që biznesmeni ishte në arrati.
Ndaj Shpatarakut është ngritur akuza për “përkrahje të autorit të krimit”. Ai ishte shpallur në kërkim edhe për një tjetër episod, pasi dyshohet se kishte kërcënuar me jetë punonjësit e një hoteli në jug të vendit.
Në kuadër të operacionit, agjentët e BKH-së kanë ushtruar edhe kontrolle në banesën e Shpatarakut, në zonën e Liqenit të Thatë.
Agasi dërgohet në Tiranë, 48 orë në Bllokun e Sigurisë
Pas arrestimit në Durrës, Ergys Agasi është transportuar drejt Drejtorisë së Policisë së Tiranës, ku kanë mbërritur edhe agjentët e BKH-së për ekzekutimin e masës së arrestit.
Gjykata e Posaçme kishte caktuar më herët ndaj tij masën e sigurisë “arrest në burg”, në kuadër të hetimeve për dosjen e tenderëve të AKSHI-t.
Pas përfundimit të procedurave, rreth tre orë më vonë, Agasi është dërguar në Bllokun e Sigurisë. Aty do të qëndrojë për 48 orë, deri në momentin kur do të dalë përpara Gjykatës së Posaçme për vlerësimin e masës së sigurisë.
Çfarë dyshon SPAK për rolin e Agasit në tenderët e AKSHI-t?
Ergys Agasi është një prej personave të hetuar në dosjen e SPAK-ut për tenderët e Agjencisë Kombëtare të Shoqërisë së Informacionit.
Sipas hetimeve të SPAK-ut, Agasi dyshohet se qëndronte në krye të një grupi kriminal që përdorte konkurrencën e pandershme, presionet dhe ndikimin për të paracaktuar fituesit e tenderëve të AKSHI-t.
Në fokus të hetimit janë edhe transaksionet financiare të kompanisë “EA Solution”, e lidhur me Agasin.
Një prej elementëve të përmendur në hetime janë edhe pagesat për verëra të shtrenjta, me një vlerë që, sipas dosjes, arrin në afro 1 milion euro.
SPAK dyshon se Agasi kishte krijuar lidhje të ngushta me drejtues të AKSHI-t dhe se këto marrëdhënie i shërbenin për të ndikuar në proceset e prokurimit.
Në kuadër të kësaj dosjeje është hetuar edhe ish-drejtorja e AKSHI-t, Mirlinda Karçanaj, e cila është marrë e pandehur dhe më pas ka dhënë dorëheqjen nga drejtimi i institucionit. Ndaj saj është caktuar masa e sigurisë “detyrim për paraqitje”.
Akuzat ndaj biznesmenit
Ergys Agasi akuzohet për disa vepra penale. Në dosjen e hetimit janë përfshirë ndër të tjera akuzat për:
- “Grup i strukturuar kriminal”;
- “Konkurrencë e paligjshme nëpërmjet dhunës”;
- “Heqje e paligjshme e lirisë”;
- “Shkelje e barazisë së pjesëmarrësve në tendera apo ankande publike”;
- korrupsion.
Fillimisht ndaj tij ishin ngritur disa akuza, ndërsa më vonë në kuadër të zgjerimit të hetimeve iu shtua edhe akuza e korrupsionit.
29 prona të sekuestruara
Në kuadër të hetimit financiar, autoritetet kanë sekuestruar në total 29 pasuri që lidhen me Ergys Agasin.
Mes pasurive të sekuestruara janë apartamente, vila dhe sipërfaqe toke në zona të ndryshme të Tiranës dhe Durrësit. Në listën e aseteve të vendosura nën sekuestro përfshihen gjithashtu llogari bankare dhe kompania “EA Solution”.
Në mesin e pasurive të sekuestruara është edhe një pjesë e “Equos Resort”.
Sekuestrimi i pasurive është kryer në kuadër të hetimit financiar, ndërsa SPAK ka ngritur dyshime se këto asete lidhen me aktivitetin e paligjshëm që po hetohet në dosjen e AKSHI-t.
26 Gusht 2026, 13:14
Qeveria e Malit të Zi ka vendosur një tjetër ulje të akcizave për benzinën dhe naftën, me synim zbutjen e ndikimit të rritjes së çmimeve globale të karburanteve.
Nga 25 gushti, akciza për benzinën pa plumb zbret në 0.522 euro për litër, ndërsa ajo për naftën në 0.352 euro, nga 0.396 euro që ishte më parë. Masat do të jenë në fuqi deri më 5 shtator.
Si pasojë e ndërhyrjes, nafta do të shitet me 1.87 euro për litër, 1 cent më lirë. Edhe Eurosuper 98 pëson një ulje prej 1 centi, duke shkuar në 1.79 euro, ndërsa Eurosuper 95 mbetet në 1.76 euro për litër.
Çmimet për javën e ardhshme do të përcaktohen më 1 shtator, bazuar në çmimet ndërkombëtare të naftës dhe kursin dollar-euro.
Qeveria malazeze ka ndërhyrë disa herë me ulje të përkohshme të akcizave që prej marsit, në përpjekje për të kufizuar ndikimin e luhatjeve të forta të tregut ndërkombëtar.
26 Gusht 2026, 13:07
Qytetarët do të organizohen sërish për të kërkuar dorëheqjen e kryeministrit Edi Rama dhe ndryshimin e kursit politik në vend.
Protesta pritet të nisë organizimin në sheshin “Skënderbej”, nga ku protestuesit më pas do të marshojnë përgjatë bulevardit drejt Kryeministrisë. Pas mbërritjes përpara godinës së ekzekutivit mbahen fjalimet, ku qytetarët shprehin shqetësimet dhe pakënaqësitë e tyre ndaj politikave të qeverisë.
Kërkesa kryesore e protestuesve mbetet largimi i Edi Ramës nga detyra. Në platformën e tyre përfshihet edhe krijimi i një qeverie tranzitore me mandat 12-mujore, e cila do të përgatiste vendin për zgjedhjet e ardhshme.
Protestuesit kërkojnë gjithashtu shfuqizimin e disa nismave ligjore që, sipas tyre, dëmtojnë interesat e qytetarëve shqiptarë.
Organizatorët kanë deklaruar se protesta do të vijojë edhe në ditët në vazhdim dhe se nuk do të ketë tërheqje deri në plotësimin e kërkesave të tyre.
26 Gusht 2026, 12:59
Një 26-vjeçar nga Kruja është arrestuar në flagrancë nga policia, pasi dyshohet se po transportonte një pistoletë drejt Tiranës me qëllim shitjen e saj.
Operacioni policor, i koduar “Price”, u zhvillua pas informacionit të siguruar në rrugë operative për lëvizjen e të riut të armatosur në drejtim të kryeqytetit.
Shërbimet e Forcës së Posaçme Operacionale, në bashkëpunim me specialistët e Seksionit për Hetimin e Trafiqeve, ndërhynë në zonën e Kthesës së Kamzës, ku ndaluan automjetin që drejtohej nga shtetasi N. D., 26 vjeç, banues në Krujë.
Gjatë kontrollit të automjetit, efektivët gjetën dhe sekuestruan një armë zjarri, tip pistoletë, e cila dyshohet se ishte siguruar për t’u shitur në Tiranë. Në cilësinë e provës materiale u sekuestruan gjithashtu automjeti dhe telefoni celular i të arrestuarit.
Hetimet vijojnë për të zbardhur plotësisht rrethanat e rastit, si dhe për të identifikuar persona të tjerë që mund të kenë lidhje me sigurimin apo shitjen e armës.
Materialet e çështjes i janë referuar Prokurorisë për procedurat e mëtejshme ligjore.
26 Gusht 2026, 12:52
Gjashtë persona që punojnë në aeroportin e Frankfurtit janë prekur nga malaria, ndërsa një prej tyre ka ndërruar jetë. Autoritetet gjermane po hetojnë burimin e infeksionit, pasi bëhet fjalë për një mënyrë transmetimi tepër të rrallë në vend.
Rastet u bënë publike fillimisht në korrik, kur u konfirmua se katër punonjës ishin infektuar. Së fundmi, numri i rasteve ka shkuar në gjashtë, ndërsa pesë të prekurit e tjerë po marrin trajtim në spital ose nën kujdes mjekësor.
Dyshimi kryesor i autoriteteve lidhet me mushkonja të infektuara që mund të kenë hyrë në Gjermani përmes avionëve. Sipas hipotezës së hetuesve, insektet mund të kenë ardhur nga vende ku malaria është endemike dhe të kenë mbërritur në aeroport nëpërmjet hapësirave të avionëve, veçanërisht zonave të ngarkesave.
Fenomeni njihet si “airport malaria” dhe është jashtëzakonisht i pazakontë në Gjermani. Në këtë skenar, mushkonjat e infektuara mund të pickojnë njerëzit dhe të transmetojnë parazitin që shkakton malarien.
Për të përcaktuar nëse ky është shkaku i rasteve, në aeroport janë vendosur kurthe speciale për mushkonjat. Disa insekte janë kapur tashmë dhe pritet t’u nënshtrohen analizave laboratorike për të parë nëse janë bartëse të parazitit.
Autoritetet kanë bërë të qartë se nuk ka prova për përhapje të malaries nga një person te tjetri. Sëmundja transmetohet kryesisht përmes pickimit të mushkonjave të infektuara të gjinisë Anopheles.
Punonjësve të aeroportit u është kërkuar të tregojnë kujdes ndaj simptomave të mundshme. Fraport i ka këshilluar ata që, nëse nuk ndihen mirë dhe shfaqin shenja që mund të lidhen me malarien, të kërkojnë menjëherë ndihmë mjekësore dhe të informojnë mjekun se janë të punësuar në aeroport.
Ngjarja ka tërhequr vëmendje të veçantë pikërisht për shkak të rrallësisë së saj. Në Gjermani, pjesa më e madhe e rasteve të malaries diagnostikohen te persona që janë infektuar gjatë udhëtimeve në rajone tropikale. Një studim europian ka evidentuar 145 raste të lidhura me aeroporte ose bagazhe në Europë nga viti 1969 deri në 2024, ndërsa vetëm nëntë prej tyre janë raportuar në Gjermani.
Malaria mund të përparojë në forma të rënda dhe të bëhet kërcënuese për jetën. Në raste të komplikuara, sëmundja mund të shkaktojë dëmtime serioze të organizmit, koma dhe vdekje.
26 Gusht 2026, 12:49
Një krim i rëndë ka ndodhur në Prizren, ku një grua rreth moshës 80 vjeçare dyshohet se është vrarë nga burri i saj.
Lidhur me këtë rast ka folur Shaqir Bytyqi nga policia në Prizren.
‘’Sot në orët e hershme të mëngjesit rreth orë 1:30 minuta, policia ka pranuar informata se në një shtëpi banimi në Prizren, është gjetur pa shenja jete një femër diku rreth moshës 80 vjeçare. Policia dhe ekipi emergjencës kanë dalë në vendngjarje, të cilët e kanë konstatuar vdekjen e viktimës. Bashkshorti i saj rreth moshës 80 vjeçar, është shoqëruar në stacionin policor. Fillimisht është raportuar si vdekje aksidentale nga bashkëshorti i saj, pas ekzaminimit të vendit të ngjarjes, ka lind dyshimi për vrasje të rëndë. Ka pas lëndime në pjesë të ndryshme të trupit. Sipas evidencave të policisë qifti nuk ka pasur raste të mëhershme të dhunës së raportuar, dhe në momentin e incidentit kanë qenë vetëm në shtëpi’’, ka thënë ai.
25 Gusht 2026, 13:27
Të paktën 62 gra janë vrarë nga familjarët në Kosovë që nga viti 2010, sipas të dhënave të paraqitura në grafik, bazuar në rastet e regjistruara nga Policia e Kosovës.
Të dhënat përfshijnë periudhën nga viti 2010 deri në gusht të vitit 2026 dhe tregojnë një problem të vazhdueshëm të vrasjeve të grave brenda familjes.
Numri më i lartë i rasteve është regjistruar në vitin 2018 dhe 2020, me nga 7 gra të vrara në secilin vit.
Në vitin 2010 janë regjistruar 6 raste, ndërsa në vitin 2011 pesë. Nga viti 2012 deri më 2017, numri vjetor ka lëvizur nga një deri në tre raste.
Pas kulmit prej shtatë rastesh në vitin 2018, në vitin 2019 janë regjistruar pesë vrasje, ndërsa në vitin 2020 sërish shtatë.
Në vitet pasuese, të dhënat tregojnë:
2021 – 3 gra të vrara
2022 – 4 gra
2023 – 4 gra
2024 – 3 gra
2025 – 1 grua
2026 – 3 gra, deri në gusht
25 Gusht 2026, 13:25
Një sasi e dyshuar lënde narkotike është zbuluar në ambientet e paraburgimit 313 në Tiranë, gjatë një kontrolli të zhvilluar nga strukturat e Drejtorisë së Përgjithshme të Burgjeve, në bashkëpunim me Agjencinë e Mbikëqyrjes në Sistemin e Ekzekutimit të Vendimeve Penale (AMSEVP).
Sipas burimeve, lënda e dyshuar narkotike ishte fshehur brenda ushqimeve. Dyshohet se bëhet fjalë për hashash dhe kokainë. Kontrollet në institucionet penitenciare janë intensifikuar për të parandaluar futjen e lëndëve narkotike, telefonave celularë dhe sendeve të tjera të ndaluara.
Rasti në paraburgimin 313 vjen pas disa konstatimeve të ngjashme në burgje të tjera. Një ditë më parë, gjatë një kontrolli në burgun e Fushë-Krujës, u sekuestrua një telefon celular, ndërsa një tjetër pajisje ishte gjetur javën e kaluar në burgun e Peqinit. Operacionet e kontrollit synojnë evidentimin e shkeljeve dhe forcimin e masave të sigurisë në institucionet e vuajtjes së dënimit.
25 Gusht 2026, 10:30
Integrimi i papërfunduar i Ballkanit Perëndimor në strukturat evropiane dhe euroatlantike po krijon hapësirë që Rusia të shfrytëzojë përçarjet ekzistuese politike dhe shoqërore në rajon. Kështu ka deklaruar Matthew Palmer, ish-përfaqësues special i Sekretarit amerikan të Shtetit për Ballkanin Perëndimor, në një intervistë për agjencinë FENA.
Palmer, i cili e njeh nga afër rajonin, ka paralajmëruar se Ballkani Perëndimor është veçanërisht i cenueshëm ndaj ndikimeve të jashtme për shkak të ndarjeve të brendshme. “100 për qind. Kemi parë interesin e Rusisë për të identifikuar çarjet, ndarjet, boshllëqet dhe pikat e dobëta në strukturat evropiane dhe më pas të fusë pikërisht aty kunja, duke u përpjekur t’i zgjerojë ato”, ka thënë Palmer.
Sipas tij, Rusia po vepron si në nivelin politik, ashtu edhe në atë shoqëror, ndërsa është shumë aktive edhe në hapësirën online. “Ballkani është veçanërisht i cenueshëm sepse është i ndarë në shumë mënyra, i ndarë kundër vetvetes. Rusët kanë qenë të aftë dhe agresivë në shfrytëzimin e këtyre dallimeve”, ka deklaruar ai.
Integrimi në BE dhe NATO, më i rëndësishëm se kurrë
Palmer ka vlerësuar se ndryshimet në mjedisin e sigurisë evropiane e bëjnë edhe më të domosdoshëm integrimin e Ballkanit Perëndimor në institucionet evropiane dhe euroatlantike. “Ndryshimet në hapësirën evropiane të sigurisë vetëm sa e theksojnë rëndësinë e integrimit të Ballkanit Perëndimor në institucionet evropiane dhe euroatlantike”, ka thënë ai.
Ai ka theksuar se forcimi i kapaciteteve evropiane të sigurisë nuk duhet të nënkuptojë dobësim të partneritetit transatlantik, por një Evropë më të aftë për të marrë përgjegjësi për sigurinë e saj. Sipas Palmerit, shtetet e Ballkanit Perëndimor kanë një nxitje të shtuar për t’i forcuar lidhjet me BE-në dhe NATO-n.
Paralajmërimi për Bosnjë-Hercegovinën
Duke folur për Bosnjë-Hercegovinën, Palmer ka thënë se një nga problemet kryesore mbeten ndarjet e brendshme dhe mungesa e një ndjenje të përbashkët të përkatësisë shtetërore. Ai ka bërë thirrje për forcimin e shtetit, luftën kundër korrupsionit, sundimin e ligjit dhe mbrojtjen e institucioneve demokratike. Sipas Palmer, është e rëndësishme që të rinjtë, pavarësisht përkatësisë së tyre etnike, ta shohin të ardhmen në vendin e tyre. “Duhet të zhvillohet një ekonomi që do t’i inkurajojë të rinjtë e Bosnjë-Hercegovinës, pavarësisht identitetit të tyre etnik, të qëndrojnë në Bosnjë-Hercegovinë, të ndërtojnë jetën e tyre dhe të krijojnë familje këtu”, ka thënë Palmer.
Ai ka paralajmëruar gjithashtu se kërcënimet ndaj Evropës në vitet e ardhshme nuk do të vijnë domosdoshmërisht nga konfliktet mes shteteve, por mund të burojnë nga problemet e brendshme. Në këtë drejtim, ai ka veçuar luftën kundër korrupsionit, forcimin e sundimit të ligjit, demokracinë dhe ekonominë e qëndrueshme si faktorë kryesorë të sigurisë. “Një kontinent i ndarë kundër vetvetes është një kontinent i cenueshëm ndaj kërcënimeve të jashtme”, ka përfunduar Palmer.
Palmer do të marrë pjesë në fillim të shtatorit në Sarajevo Security Conference, e cila do të mbahet nga 4 deri më 6 shtator dhe do të mbledhë zyrtarë ndërkombëtarë, diplomatë, përfaqësues ushtarakë dhe ekspertë për të diskutuar sfidat e sigurisë në Evropë dhe Ballkanin Perëndimor.
25 Gusht 2026, 10:18
Një futbollist serb, Uroš Milošević, është arrestuar në Portugali pasi policia ndaloi furgonin që ai po drejtonte në autostradën A6, brenda të cilit u gjetën më shumë se 1.5 ton kokainë, me një vlerë të përllogaritur mbi 70 milionë euro, si dhe armë të tipit ushtarak.
Operacioni u zhvillua nga Policia Gjyqësore portugeze dhe u cilësua si një goditje e rëndësishme ndaj një rrjeti kriminal të njohur si “Karteli i Ballkanit”, i cili dyshohet se ka shtrirje në disa vende të Evropës.
Ajo që tërhoqi vëmendjen e autoriteteve ishte identiteti i personit që ndodhej pas timonit. Bëhet fjalë për 31-vjeçarin Uroš Milošević, i cili në të kaluarën ka luajtur futboll në disa klube serbe.
Sipas raportimeve të autoriteteve, në furgon u gjetën gjithashtu dy armë ushtarake, të cilat ishin të mbushura dhe gati për përdorim.
Ish-futbollisti, prej tre vitesh jashtë aktivitetit
Milošević nuk është një emër i njohur për publikun e gjerë të futbollit, por gjatë karrierës së tij ka qenë pjesë e disa klubeve serbe, përfshirë Čukaričkin, FK IM Rakovica, FK Teleoptik dhe FK Sinđelić Beograd.
Sipas të dhënave të publikuara, ai nuk ka qenë aktiv si futbollist gjatë tre viteve të fundit.
Autoritetet portugeze po hetojnë tashmë rolin që 31-vjeçari dyshohet se ka pasur në rrjetin e trafikut të drogës.
Operacioni lidhet me një aksion në Spanjë
Arrestimi në Portugali vjen vetëm pak ditë pas një tjetër operacioni të madh kundër të njëjtit rrjet kriminal në Spanjë.
Gjatë aksionit, të zhvilluar në bashkëpunim mes autoriteteve spanjolle dhe portugeze, u arrestuan dy persona dhe u sekuestruan rreth 3.7 ton drogë.
Hetuesit dyshojnë se grupi kriminal ka përdorur prej kohësh territorin e Portugalisë, veçanërisht zonat bregdetare, si pikë hyrëse për ngarkesa të mëdha kokaine që më pas shpërndaheshin në vende të ndryshme të Evropës.
Hetimet vazhdojnë
“Karteli i Ballkanit” dyshohet se ka një rrjet të gjerë aktiviteti në Evropë dhe se mbështetet në persona me origjinë nga vendet e ish-Jugosllavisë.
Autoritetet po vijojnë hetimet për të zbardhur strukturën e rrjetit dhe për të përcaktuar rolin e saktë të Miloševićit në transportin e ngarkesës.
Policia portugeze nuk përjashton mundësinë e arrestimeve të tjera në kuadër të këtij operacioni.
