29 Gusht 2026, 12:37
Ish-zyrtari i lartë i Policisë së Shtetit, Uljan Shpataraku, është përballur këtë të shtunë me Gjykatën e Posaçme për caktimin e masës së sigurimit.
Pas seancës, gjykata ka vendosur ndaj Shpatarakut masën e sigurisë “arrest në burg”. Ai akuzohet për veprën penale të përkrahjes së autorit të krimit.
Shpataraku u arrestua nga autoritetet teksa drejtonte automjetin me të cilin udhëtonte Ergys Agasi, person i shpallur në kërkim nga drejtësia. Sipas hetimeve, ish-zyrtari i Policisë dyshohet se ka ndihmuar Agasin, duke e transportuar me automjet, çka ka çuar në ngritjen e akuzës për përkrahje të autorit të krimit.
Vendimi i Gjykatës së Posaçme për masën e sigurisë vjen në kuadër të hetimeve që po zhvillohen lidhur me personat e përfshirë në çështjen e Ergys Agasit.
29 Gusht 2026, 12:17
Sot shënohet dita e 91-të e protestës qytetare kundër qeverisë dhe kryeministrit Edi Rama. Qytetarët vijojnë të mblidhen në Tiranë, duke kërkuar dorëheqjen e kryeministrit dhe ndryshimin e sistemit politik.
Protesta vjen pas 90 ditësh mobilizimi të njëpasnjëshëm, gjatë të cilave protestuesit kanë marshuar nga sheshi “Skënderbej” drejt Kryeministrisë, duke përcjellë mesazhe kundër qeverisë.
Kërkesa kryesore e protestuesve mbetet largimi i Edi Ramës. Në platformën e tyre kërkohet gjithashtu krijimi i një qeverie tranzitore me mandat 12-mujor dhe ndryshimi i kursit politik të vendit.
Gjatë protestës së mbrëmshme, qytetarët marshuan në rrugët e kryeqytetit me thirrje kundër qeverisë dhe kryeministrit, duke deklaruar se nuk do të tërhiqen deri në plotësimin e kërkesave të tyre.
Dje në ditën e 90-të, protestuesit e cilësuan lëvizjen si një revoltë qytetare kundër klasës së vjetër politike. Përmes pankartave u përcoll edhe mesazhi “90 ditë, një kërkesë: llogaridhënie”, ndërsa organizatorët paralajmëruan vijimin e protestave.
Edhe sot, në ditën e 91-të, qytetarët pritet të mblidhen në shesh dhe të marshojnë në rrugët e Tiranës, duke kërkuar që presioni qytetar të vijojë deri në një ndryshim politik.
Ndërkohë, për 12 shtatorin është paralajmëruar një protestë kombëtare, ku pritet t’i bashkohet lëvizjes edhe Diaspora.
29 Gusht 2026, 11:28
Michael Jackson do të festonte më 29 gusht, 68-vjetorin e lindjes. Edhe 17 vite pas vdekjes së tij, emri i Mbretit të Pop-it vazhdon të jetë në qendër të vëmendjes, me evente në SHBA, projekte të reja filmike, muzikë që rikthehet në klasifikime dhe një brez të ri artistësh që vazhdon të frymëzohet prej tij.
Michael Jackson lindi më 29 gusht 1958 në Gary, Indiana dhe ndërroi jetë në vitin 2009, në moshën 50-vjeçare. Sot, në qytete të ndryshme të botës, fansat po e shënojnë ditëlindjen e tij me aktivitete dhe homazhe.
Spike Lee rikthen “BK Loves MJ” në Brooklyn
Një prej aktiviteteve më të mëdha zhvillohet në Brooklyn, ku regjisori Spike Lee rikthen festën e përvitshme “BK Loves MJ”. Eventi zhvillohet sot në Fort Greene Park dhe është një festë falas shtatëorëshe, me muzikë dhe kërcim. Në të do të jetë edhe DJ Spinna, ndërsa organizimi realizohet në partneritet me Jordan Brand.
Spike Lee është prej vitesh një prej admiruesve më të mëdhenj publikë të Michael Jackson dhe festa në Brooklyn është kthyer në një prej aktiviteteve më të njohura për fansat e këngëtarit.
Edhe Las Vegas do kujtojë Michael Jackson
Në Las Vegas, ditëlindja e Jackson po shënohet me një event të veçantë gjatë shfaqjes “Michael Jackson ONE”, produksioni i Cirque du Soleil i dedikuar muzikës dhe trashëgimisë së këngëtarit.
Fansat janë mbledhur për një festë speciale që kulmon me një performancë të veçantë të kastit të shfaqjes.
Gary nderon djalin e saj më të famshëm
Edhe qyteti i lindjes së Michael Jackson, Gary në Indiana, po e kujton ikonën e tij.
Sot dhe nesër zhvillohet “2300 Jackson Street Block Party”, një aktivitet dyditor që nderon Michael Jackson dhe familjen Jackson. Programi përfshin muzikë, DJ, të ftuar dhe aktivitete të ndryshme për komunitetin.
Në të njëjtën kohë, një koleksion i ri i krijuar në bashkëpunim me markën Actively Black po përdoret edhe për të mbledhur fonde në ndihmë të Gary-t, qytetit që prej vitesh përballet me probleme sociale dhe ekonomike.
“Michael” riktheu Mbretin e Pop-it në kinema
Një prej arsyeve pse 68-vjetori i Jackson është edhe më i veçantë këtë vit është suksesi i filmit biografik “Michael”. Në rolin e Michael Jackson shfaqet nipi i tij, Jaafar Jackson. Filmi ka rikthyer historinë e këngëtarit përpara një audience të re dhe ka hapur diskutime të shumta mbi jetën, karrierën dhe figurën e tij.
Suksesi i filmit ka sjellë tashmë edhe diskutime për një vazhdim. Jaafar Jackson ka zbuluar se një film i dytë mund të trajtojë periudhat më të komplikuara të jetës së Michael Jackson, përfshirë akuzat, të cilat nuk u përfshinë në filmin e parë për arsye ligjore. Sipas Jaafar, vazhdimi do të përpiqet ta tregojë historinë edhe nga këndvështrimi i vetë Michael Jackson.
Muzika e Michael Jackson vazhdon të jetojë
Në ditëlindjen e tij, edhe muzika e Michael Jackson po rikthehet në qendër të vëmendjes. Këngët dhe albumet e tij vazhdojnë të jenë pjesë e klasifikimeve muzikore, ndërsa katalogu i tij mbetet një prej pasurive më të rëndësishme në historinë e muzikës pop.
“Thriller”, “Billie Jean”, “Beat It”, “Bad”, “Smooth Criminal” dhe dhjetëra hite të tjera vazhdojnë të dëgjohen nga miliona njerëz në mbarë botën. Gjatë vitit 2026, muzika e Jackson ka përjetuar një rikthim të fortë në vëmendjen e publikut. Mediat kanë raportuar për performancën e këngëve të tij në platformat e streaming-ut dhe për interesin e një gjenerate të re, e cila po e zbulon artistin përmes rrjeteve sociale, TikTok-ut dhe filmit “Michael”.
Por ndikimi i Jackson shkon përtej muzikës. Nga “Moonwalk”-u te koreografitë, moda, videoklipet dhe mënyra e ndërtimit të spektaklit, stili i tij vazhdon të frymëzojë dhe të përshtatet nga artistë të rinj. Festimet dhe aktivitetet e organizuara në Brooklyn, Las Vegas dhe Gary, së bashku me projektet e reja që lidhen me trashëgiminë e tij, tregojnë se interesi për Mbretin e Pop-it mbetet i fortë.
17 vjet pas vdekjes së tij, Michael Jackson vazhdon të jetë një nga figurat më të rëndësishme të kulturës globale. Ditëlindja e tij nuk është vetëm një moment nostalgjie për fansat, por edhe një kujtesë e ndikimit të jashtëzakonshëm që ai pati në muzikë, kërcim, modë dhe kulturën pop. Artistë të rinj vazhdojnë të frymëzohen nga muzika e tij, “Moonwalk”-u dhe mënyra unike e performancës, duke e mbajtur gjallë trashëgiminë e tij për breza të rinj.
Michael Jackson, ndër humanitarët më të mëdhenj në botë
Michael Jackson u njoh jo vetëm për talentin e tij të jashtëzakonshëm, por edhe për humanizmin dhe përkushtimin ndaj kauzave sociale. Ai ishte një nga figurat më të njohura të artit për angazhimin e tij humanitar.
Gjatë jetës së tij, vlerësohet se Michael Jackson dhuroi mbi 500 milionë dollarë për kauza bamirësie dhe mbështeti 39 organizata humanitare, një rekord i njohur nga Guinness World Records për një artist pop. Kjo shifër është raportuar edhe nga Los Angeles Times, megjithëse shuma e saktë mund të jetë më e madhe, sepse shumë donacione i bënte në mënyrë private.
Ai kontribuoi gjithashtu në projekte si “We Are the World”, që mblodhi fonde për luftën kundër urisë.
Michael dhuroi 1.5 milionë dollarë për trajtimin e viktimave të djegieve. Pas aksidentit me djegie në vitin 1984, ai i dhuroi të gjithë shumën prej 1.5 milionë $ të marrë nga marrëveshja, për krijimin e një qendre për trajtimin e djegieve.
Përmes Heal the World Foundation, ai dërgoi 46 tonë ndihma në Sarajevë. Nëpërmjet aktiviteteve të tij humanitare, Jackson ndihmoi njerëz dhe komunitete në vende të ndryshme të botës.
29 Gusht 2026, 09:21
Ish-zyrtarit të Policisë së Shtetit, Uljan Shpataraku, i është hequr leja e armës, ndërsa autoritetet i kanë sekuestruar edhe armët që mbante në banesë.
Shpataraku, i cili u arrestua pasi u kap duke drejtuar automjetin e Ergys Agasit dhe akuzohet për përkrahje të autorit të krimit, u përjashtua nga radhët e Policisë së Shtetit disa javë më parë. Pas largimit nga detyra, ndaj tij nisën edhe procedurat për heqjen e lejes së armës që zotëronte për shkak të funksionit.
Gjatë këtyre procedurave, autoritetet zbuluan se ish-zyrtari policor, i konsideruar si një prej njerëzve të afërt me ish-drejtuesin e Policisë së Shtetit, Ilir Proda, zotëronte me leje edhe disa armë të tjera në banesën e tij.
Bëhet fjalë për 3 pistoleta, 2 shotgun dhe 2 pushkë, të cilat tashmë janë sekuestruar nga autoritetet.
Ndërkohë, mbetet për t’u parë nëse Prokuroria e Posaçme (SPAK) do ta përfshijë Shpatarakun në një hetim më të gjerë për lidhjet e mundshme me grupin kriminal të Ergys Agasit, i cili u arrestua gjatë një operacioni të koordinuar mes BKH-së dhe Policisë së Shtetit.
Gjithashtu, ndaj Shpatarakut janë ngritur dyshime se mund të ketë pasur një precedent penal në të kaluarën jashtë vendit, të cilin nuk e ka deklaruar. Kjo rrethanë pritet të verifikohet dhe të hetohet më tej nga autoritetet.
Këtë të shtunë Shpataraku që akuzohet për “përkrahje të autorit të krimit”, do të njihet me masën e sigurisë në GJKKO.
29 Gusht 2026, 09:17
Presidenti i SHBA-së, Donald Trump tha se Shtetet e Bashkuara kanë arritur një marrëveshje me Venezuelën për të marrë kontrollin e më shumë se 65 miliardë fuçive të rezervave të provuara të naftës së vendit.
“Ky transaksion historik i dyfishon shumë rezervat amerikane të naftës, rrit shumë furnizimin tonë me naftë dhe do të ulë ndjeshëm çmimet e gazit për të gjithë amerikanët, shumë kohë në të ardhmen”, tha Trump në platformën e tij Truth Social, duke e përshkruar atë si marrëveshja më e madhe e naftës në historinë botërore.
Ai tha se marrëveshja u arrit në koordinim me presidenten e përkohshme të Venezuelës, Delcy Rodríguez, dhe përfshinte kompani të sektorit privat.
Detajet e mëtejshme të marrëveshjes nuk ishin menjëherë të disponueshme.
Nuk pati konfirmim të menjëhershëm nga Venezuela.
29 Gusht 2026, 09:15
27 Gusht 2026, 10:44
Një tragjedi e rëndë ka goditur një familje shqiptare në Jacksonville të Floridës, ku tre fëmijë kanë humbur jetën si pasojë e një zjarri të fuqishëm që përfshiu banesën e tyre dykatëshe në orët e para të mëngjesit të së mërkurës, 26 gusht.
Katër persona të tjerë, dy fëmijë dhe dy të rritur, ndodhen në gjendje kritike në spital. Bilanci është konfirmuar nga shefi i Departamentit të Zjarrfikësve dhe Shpëtimit të Jacksonville, Percy Golden.
Zjarri shpërtheu rreth orës 05:15 në Windergate Drive, pranë Old St. Augustine Road. Kur ekipet e emergjencës mbërritën në vendngjarje, kati i parë i banesës ishte përfshirë nga flakët, ndërsa kati i dytë ishte mbushur me tym të dendur.
Dy të rritur dhe dy fëmijë kishin arritur të dilnin nga banesa. Gjatë kontrollit të ndërtesës, zjarrfikësit gjetën tre fëmijët e tjerë pa shenja jete.
Një fqinj u tha mediave amerikane se banorë të zonës ndihmuan në përpjekjet për shpëtim, duke nxjerrë nga një dritare e katit të dytë një foshnjë dhe një të rritur.
Të afërmit që mbërritën në vendngjarje konfirmuan për mediat lokale se familja është me origjinë nga Shqipëria.
Në vendngjarje ishin edhe gjyshërit e fëmijëve, Alia dhe Artan Sulollari. Pamjet e publikuara nga mediat amerikane tregojnë momentet e dhimbshme të familjarëve pranë banesës së përfshirë nga zjarri.
Fotot nga vendngjarja tregojnë banesën e dëmtuar rëndë nga flakët, ndërsa në oborr shihen ende lodra fëmijësh dhe një kosh basketbolli.
Zjarri u vu nën kontroll rreth orës 05:40. Flakët shkaktuan dëme të mëdha në banesë dhe prekën edhe dy njësi ngjitur.
Kryqi i Kuq Amerikan është angazhuar për të ndihmuar personat që kanë mbetur pa strehë.
Ndërkohë, autoritetet kanë nisur hetimet për të përcaktuar shkakun e zjarrit, i cili ende nuk është bërë i ditur.
Departamenti i Zjarrfikësve dhe Shpëtimit të Jacksonville ka shprehur ngushëllime për familjarët e tre fëmijëve që humbën jetën dhe solidaritet me të plagosurit.
27 Gusht 2026, 10:25
Kryeministri në detyrë, kryetari i Lëvizjes Vetëvendosje, Albin Kurti thotë se po e bën “më të mirën e mundshme” për formimin e institucioneve, por ndërkohë, seanca konstituive e Kuvendit, e nisur në fillim të muajit, nuk po vazhdon.
Kurti tha mbrëmë pas takimit me kryetarin e Lidhjes Demokratike të Kosovës, Lumir Abdixhiku se ai nuk ka dorë në thirrjen e vazhdimit të seancës konstituive.
“Seancën konstituive, siç e dini, e thërret deputeti më i moshuar, në këtë rast, Avni Dehari, i cili, i ka dhënë edhe ai arsyet dhe argumentet e veta pse s’po e bën një gjë të tillë”, tha ai.
Më tej, ai tha se “pati incidente në Kuvend”, duke iu referuar një situate tensionuese të para disa ditëve, ku u përfshinë ministra e deputetë nga LVV-ja dhe PDK-ja e Aleanca.
“Tash duhet ta dimë, a po duam konstituim të Kuvendit që të mos kemi zgjedhje dhe të kemi stabilitet institucional, apo po duam konstituim të Kuvendit që të kemi incidente dhe të kemi zgjedhje?”, tha Kurti.
“Unë nuk kam se çfarë diskutoj në këtë aspekt, meqenëse seancat i thërret kryesuesi aktual, i përkohshëm gjithsesi, deputeti më i moshuar, i cili, siç e thashë më herët, tashmë ka dhënë shpjegimet për veprimet e tij”, shtoi kreu i LVV-së.
Kur kanë kaluar pothuajse 3 muaj që prej mbajtjes së zgjedhjeve të jashtëzakonshme parlamentare, Kuvendi nuk është konstituuar ende.
Me kërkesë të Kurtit, seanca konstituive e Kuvendit që nisi më 6 gusht u ndërpre dy herë radhazi. Ai nuk e propozoi kandidatin për kryeparlamentar, siç kërkohet me Kushtetutë, pasi tha se do të ishte e padobishme që të zgjidhet kryeparlamentari dhe nënkryetarët pa një marrëveshje paraprake për zgjedhjen e Presidentit.
Sipas një aktgjykimi të Gjykatës Kushtetuese, më 7 gusht në mesnatë ka përfunduar afati për konstituimin e Kuvendit. Megjithatë, kryesuesi i seancës, Avni Dehari – deputeti më i vjetër i Kuvendit që vjen nga LVV-ja – e caktoi për 8 gusht vazhdimin e seancës konstituive, e cila u ndërpre nga ai në po të njëjtën mënyrë si ditën kur nisi.
LVV-ja thotë se nuk do të ketë vazhdim të seancës konstituive pa një marrëveshje paraprake për Presidentin, për zgjedhjen e të cilit është përcaktuar një afat kushtetues 60 ditor, i cili fillon të rrjedhë vetëm pasi të konstituohet Kuvendi.
27 Gusht 2026, 10:16
Një email i dërguar në disa nga institucionet e vendit ka ngritur në këmbë Policinë e Shtetit.
“Përshëndetje. Ky është Shteti Islamik. Me vullnetin e Allahut kemi vendosur një bombë në ndërtesën tuaj. Ajo do të shpoërthejë pas dy orësh Pas kësaj,. Ju të pafe do të copëtoheni. Pastaj do t’ju vrasim. Allahu Akbar”, thuhet në e-mail.
Policia më dhënë detaje në lidhje me ngjarjen duke bërë me dije se kontrolle janë zhvillua në disa institucione, por se nuk ka rezultuar të jetë vendosur bombë.
Emaili kërcënues është dërguar edhe në disa institucione në Vlorë dhe Berat.
Në Vlorë, mes institucioneve që kanë marrë mesazhin kanë qenë Gjykata, Bashkia, Prokuroria, Siptal si edhe disa institucione të tjera. Mesazhi është dërguar përmes një adrese emaili të huaj dhe përmbante paralajmërimin: “Kujdes, kemi vendosur bombë”.
Pas marrjes së alarmit, në institucionet e prekura janë angazhuar shërbimet e specializuara. Njësia Speciale Operacionale e Policisë së Vlorës ka kryer kontrolle të imtësishme në ambientet e institucioneve, përfshirë edhe kontrollet për lëndë apo pajisje shpërthyese.
Njoftimi i Policise se Shtetit
Mëngjesin e sotëm, në adresat elektronike të disa institucioneve në disa qytete të vendit, është dërguar një e-mail nga një adresë ende e paidentifikuar, me përmbajtje kërcënuese dhe terroriste, në të cilin pretendohet se në këto institucione është vendosur një bombë.
Menjëherë pas marrjes së këtij informacioni, strukturat e Policisë së Shtetit po kryejnë të gjitha verifikimet e nevojshme në institucionet e përfshira në këtë kërcënim. Nga kontrollet e kryera deri tani, nuk ka rezultuar të jetë vendosur bombë apo ndonjë lloj tjetër eksplozivi.
Ndërkohë, Drejtoria për Hetimin e Krimeve Kibernetike, në bashkëpunim me Drejtorinë e Antiterrorit dhe agjenci të tjera ligjzbatuese, vijojnë punën intensive për identifikimin e autorit dhe të adresës elektronike nga e cila janë dërguar këto kërcënime.
Policia e Shtetit siguron qytetarët se nuk ka vend për panik dhe se strukturat e saj janë të angazhuara maksimalisht për garantimin e rendit dhe sigurisë publike, si dhe për parandalimin dhe goditjen e paligjshmërive.
26 Gusht 2026, 20:30
