Ish-ministri ukrainas i Mbrojtjes, Mykhailo Fedorov, i shkarkuar vetëm një muaj më parë nga presidenti Volodymyr Zelenskyy, i është drejtuar qytetarëve ukrainas përmes një video-mesazhi, duke bërë thirrje për gjetjen e një mekanizmi që do të mundësonte zhvillimin e zgjedhjeve edhe gjatë luftës.
Fedorov, shkarkimi i të cilit shkaktoi protesta nga mbështetësit e tij, kritikoi korrupsionin gjatë kohës së luftës dhe paralajmëroi për një krizë sistemike të qeverisjes në vend.
“Demokracia nuk mund të mbahet peng nga Rusia. Ne po luftojmë pikërisht sepse duam të mbetemi një shtet i lirë evropian”, deklaroi Fedorov.
Ai kërkoi krijimin e një mekanizmi ligjor, të sigurt dhe realist që do t’i mundësonte Ukrainës të rikthente procesin demokratik edhe në kushtet e një lufte të zgjatur.
Sipas tij, duhet të garantohet e drejta e votës për ushtarakët, për miliona ukrainas që ndodhen jashtë vendit dhe për qytetarët që jetojnë në zonat pranë vijës së frontit. Fedorov theksoi gjithashtu nevojën për sigurinë e procesit zgjedhor, pavarësinë e institucioneve dhe besueshmërinë e rezultatit.
Komentet e ish-ministrit mund të shtojnë presionin ndaj Zelenskyt, i cili është përballur me skandale korrupsioni dhe kritika lidhur me disa vendime të fundit për emërime dhe shkarkime.
Zelenskyy u zgjodh president në vitin 2019 për një mandat pesëvjeçar. Megjithatë, zgjedhjet nuk janë zhvilluar që nga nisja e pushtimit në shkallë të gjerë nga Rusia në shkurt të vitit 2022, pasi në Ukrainë vijon të jetë në fuqi ligji ushtarak.
Një burrë i maskuar me fytyrën e personazhit horror Chucky dyshohet se ka frikësuar dhe ndjekur në mënyrë të rastësishme të paktën gjashtë persona në Filadelfia.
Policia ka publikuar fotografi dhe pamje të të dyshuarit, duke u bërë apel qytetarëve që të japin çdo informacion që mund të ndihmojë në identifikimin e tij.
Në një prej videove të publikuara nga autoritetet, burri shihet duke ndjekur një grua që vrapon në rrugë, në orët e para të mëngjesit. Ngjarja është regjistruar pranë Bashkisë së Filadelfias, rreth orës 05:30 të mëngjesit të së mërkurës së kaluar.
Sipas policisë, 40-vjeçarja është ndjekur nga i dyshuari, i cili iu afrua duke i drejtuar celularin dhe e pyeti: “Je gati të vdesësh?”
Kur gruaja nuk reagoi, ai ia përsëriti pyetjen. E frikësuar, ajo u largua me vrap, por gjatë arratisjes pësoi një dëmtim në këmbë.
Autoritetet po hetojnë rastin dhe po përpiqen të përcaktojnë nëse i njëjti person qëndron pas të gjitha incidenteve.
Kur sheh pamjet e atentatit të dështuar në Elbasan, të tmerron menjëherë ideja se diku në kafenenë ku ulemi për pak minuta çlodhje e për të pirë një kafe, mes klientëve mund të jetë një njeri i armatosur, që pret me qetësi momentin e përshtatshëm për të vrarë një tjetër.
Por, përtej vetë aktit kriminal, ka diçka tjetër në ato pamje që të trondit edhe më shumë, ajo që ndodh përreth.
Veçanërisht gruaja që ndodhet në tavolinë me autorin. Nga pamjet e kamerave të sigurisë duket se ajo nuk shfaq ndonjë reagim alarmi në momentin kur burri tërheq këmbëzën e armës në kokën e tjetrit. Më pas vijon të sillet me një qetësi që të lë pa fjalë dhe madje paguan edhe faturën.
Nga video nuk mund të kuptojmë çfarë dinte ajo, çfarë kishte dëgjuar apo nëse ishte në dijeni të planit. Por qetësia e saj dhe mënyra se si vijon të sillet në raport me veprimet e burrit të trondit.
Gratë kanë një rol të rëndësishëm në shoqëri, jo sepse janë domosdoshmërisht më të brishta apo më pak të prirura ndaj dhunës, por sepse shpesh kanë një ndikim të fortë në mënyrën se si ndërtohen marrëdhëniet, si menaxhohen konfliktet dhe si vendosen kufijtë moralë brenda familjes dhe komunitetit. Ky rol bëhet edhe më i rëndësishëm kur përballë kemi dhunën.
Një grua apo një burrë në ato kushte nuk duhet parë automatikisht si bashkëfajtore, sepse pamjet e një kamere nuk na tregojnë çfarë dinte apo çfarë përjetonte. Por shoqëria ka nevojë që gratë, ashtu si burrat, të jenë një forcë që e zbut konfliktin, e refuzon dhunën dhe nuk e pranon armën si diçka normale. Çdo njeri, pavarësisht gjinisë, përballë një krimi duhet të ketë një kufi moral që i thotë “Kjo nuk mund të ndodhë para meje dhe unë të sillem sikur nuk po ndodh”.
Dhe pastaj janë të tjerët… njerëzit në tavolina. Disa që nuk lëvizin. Disa që ngrihen në këmbë dhe shohin me kureshtje çfarë po ndodh. Një skenë që, në vend të panikut dhe reagimit të menjëhershëm, duket sikur prodhon fillimisht habi dhe kureshtje.
Sigurisht, reagimi psikologjik i njerëzve përballë një ngjarjeje të papritur dhe të dhunshme është i ndryshëm. Disa mund të ngrijnë, disa mund të mos kuptojnë menjëherë çfarë po ndodh, ndërsa të tjerë mund të reagojnë vetëm pasi rreziku të jetë larguar.
Por ajo pamje ngre një shqetësim të madh. A jemi mësuar aq shumë me dhunën sa ajo nuk na trondit më siç duhet? Jemi mësuar me armët, me atentatet, me lajmet për vrasje, me konfliktet që përfundojnë me plumba, sa rrezikojmë të humbasim ndjeshmërinë ndaj tyre. Vrasja po humbet pak nga pak efektin e rëndë dhe po kthehet në një tjetër ngjarje të kronikës së përditshme. Kjo është shumë e frikshme.
Një nga treguesit e kulturës së një shoqërie është mënyra se si ajo reagon përballë dhunës. Nuk është vetëm numri i krimeve që duhet të na shqetësojë, por edhe mënyra se si njerëzit reagojnë kur krimi ndodh para syve të tyre. Sepse kur dhuna fillon të mos na trondisë më, problemi është se po shndërrohemi në një shoqëri që po mësohet me vrasjen.
Nuk dua të besoj se jemi bërë kaq të ftohtë. Nuk dua të besoj se kemi arritur në pikën ku arma në dorën e një njeriu nuk na bën të ngrihemi nga karrigia. Ku një e shtënë nuk na bën të kuptojmë se dikush mund të jetë humbasë jetën.
Kjo është çështje e humbjes së ndjeshmërisë njerëzore dhe ndoshta kjo është kriza jonë më e madhe. Jo vetëm se ka njerëz që vrasin. Por se po rrezikojmë të bëhemi një shoqëri që mësohet me vrasjen. Një shoqëri që mësohet me të keqen, një ditë mund të mos trembet më.
Aty nis rënia e vërtetë.
Jamal Musiala ka përjetuar sërish një moment shqetësues në fushë, vetëm pak ditë pasi u shtri në tokë gjatë miqësores ndaj Leipzig.
Talenti i Bayern Munich u aktivizua në minutën e 61-të në sfidën ndaj Heidenheim, por vetëm tetë minuta më vonë pësoi një tjetër kolaps. Musiala qëndroi për disa minuta në tokë, ndërsa mori menjëherë ndihmën e stafit mjekësor, përpara se të largohej nga fusha.
Pas shqetësimit të krijuar te tifozët dhe stafi i Bayern, Musiala ka reaguar vetë përmes rrjeteve sociale, duke sqaruar gjendjen e tij shëndetësore.
“Jam mirë. Gjëja e parë dhe më e rëndësishmja është se jam mirë. Jam diagnostikuar me humbje të përkohshme të vetëdijes, e cila vjen si pasojë e një mosfunksionimi neurologjik, por është diçka që mund të trajtohet. E di që mund të duket e frikshme, por nuk paraqet rrezik shtesë për shëndetin tim”, shkroi Musiala.
Ai shtoi se po merr kujdesin e nevojshëm mjekësor dhe se, pas konsultimeve me specialistët, ka marrë miratimin për të vijuar të luajë futboll.
“Ndihem mirë dhe jam në rrugën e duhur. Faleminderit të gjithëve për mbështetjen”, përfundoi 23-vjeçari.
Situata mbetet në vëmendje të Bayern Munich dhe të stafit të kombëtares gjermane, pasi Musiala konsiderohet një prej futbollistëve më të rëndësishëm të brezit të ri të Gjermanisë.
Gjykata e Tiranës ka caktuar masën e sigurisë “arrest në burg” për Ylli Zallën, pavarësisht kërkesës së mbrojtjes për një masë më të lehtë.
Avokati Dritan Gila kundërshtoi pretendimin se Zalla paraqet rrezikshmëri të lartë shoqërore. Sipas tij, armët dhe municionet janë gjetur në pjesën e pasme të banesës, mes ferrave dhe pa masa të veçanta ruajtjeje.
Mbrojtja pretendon gjithashtu se disa kapsolla detonatore nuk kanë qenë funksionale, ndërsa disa mjete shpërthyese nuk ishin të lidhura në mënyrën e duhur për të shkaktuar shpërthim.
Sa i përket armëve, avokati deklaroi se ato janë të vjetra, të prodhimit kinez, të viteve ’80. Edhe kanabisi i sekuestruar, sipas tij, ishte i ekspozuar ndaj faktorëve atmosferikë, çka tregon mungesë kujdesi për ruajtjen e tij.
Gila theksoi se Zalla nuk është i përfshirë në ngjarje të tjera kriminale dhe nuk ka prova që materialet e sekuestruara të jenë përdorur në krime apo që ai të ketë ndërmarrë veprime për shitjen e drogës.
Një tjetër argument i mbrojtjes ishte dorëzimi i tij. Avokati tha se, pavarësisht angazhimit të forcave të shumta të policisë dhe përdorimit të dronëve, Zalla nuk u kap, por u dorëzua vetë, duke thirrur një efektiv pranë banesës dhe duke u prezantuar.
Për këto arsye, mbrojtja kërkoi një masë më të lehtë sigurie, por gjykata vendosi “arrest në burg”.
Ylli Zalla u arrestua pas operacionit të policisë, ku në ambientet pranë banesës së tij u sekuestruan armë, municione, materiale shpërthyese dhe një sasi kanabisi. Për këto dyshime, Gjykata e Tiranës vendosi masën e sigurisë “arrest në burg”.
Ylli Zalla është i dyshuar për përfshirje në atentatin e Rinasit, ku u vra Gilmando Dani dhe më pas humbi jetën edhe Muçi Shaljani. Konkretisht, autoritetet dyshojnë se ai ka ndihmuar autorët e atentatit, duke u siguruar armë dhe mjete të përdorura në përgatitjen e ngjarjes.
Investimet publike të mbështetura nga Bashkimi Europian në Shqipëri po shënojnë përparim, por zbatimi i tyre vijon të përballet me vonesa për shkak të procedurave të prokurimit, mungesës së koordinimit institucional dhe problemeve me sigurimin e tokës.
Përfundimet dalin nga misioni monitorues i Komisionit Europian për investimet e financuara përmes Kornizës së Investimeve për Ballkanin Perëndimor, i zhvilluar në Shqipëri gjatë muajit maj.
Që prej vitit 2009, në Shqipëri janë investuar mbi 600 milionë euro në projekte publike në transport, energji, mjedis dhe teknologji digjitale. Një nga projektet e shqyrtuara ishte ngritja e laboratorëve inteligjentë në shkollat shqiptare, një investim që synon të përfshijë më shumë se 190 mijë nxënës. Sipas vlerësimit, përgatitja dhe hapja e tenderit vijon të jetë një proces kompleks.
Në sektorin energjetik, misioni u fokusua te parqet fotovoltaike në Vaun e Dejës dhe Belsh, si dhe te interkonjeksioni energjetik Shqipëri–Maqedoni e Veriut. Komisioni evidentoi se sigurimi dhe shpronësimi i tokës po ndikojnë në afatet e zbatimit të projekteve të energjisë dhe transportit.
BE kërkon gjithashtu thjeshtimin e procedurave për nënshkrimin dhe ratifikimin e marrëveshjeve të huave dhe granteve, si dhe shmangien e ndryshimeve të shpeshta në objektivat dhe mënyrën e zbatimit të projekteve.
Një tjetër shqetësim lidhet me kapacitetet institucionale, veçanërisht në sektorin hekurudhor, ku kërkohet forcimi i strukturave përgjegjëse dhe përgatitja më e mirë e projekteve përpara financimit.
Misioni nënvizoi nevojën për koordinim më të fortë, përgatitje më të shpejtë dhe procedura më të thjeshta për zbatimin e investimeve.
Një aksident i rëndë automobilistik ka ndodhur rreth orës 02:22 në rrugën dytësore në Manzë të Durrësit, ku kanë humbur jetën tre persona dhe janë plagosur dy të tjerë.
Sipas informacionit paraprak të policisë, shtetasi K. V., 25 vjeç, duke drejtuar automjetin, ka humbur kontrollin mbi drejtimin dhe është përplasur me një bordurë betoni.
Si pasojë e aksidentit kanë humbur jetën drejtuesi i automjetit, K. V., 25 vjeç, si dhe pasagjerët S. B., 26 vjeçe, dhe A. M., 15 vjeç.
Ndërkohë, pasagjerët R. V., 25 vjeç, dhe K. D., 16 vjeç, kanë mbetur të plagosur dhe janë transportuar drejt Tiranës për ndihmë mjekësore. Sipas policisë, 16-vjeçari K. D. ndodhet në gjendje të rëndë shëndetësore.
Grupi hetimor ndodhet në vendngjarje dhe po punon për dokumentimin e plotë të aksidentit dhe zbardhjen e rrethanave që çuan në përplasjen tragjike.
Kafeja dhe efektet e saj janë hulumtuar shkencërisht për më shumë se 150 vjet. Opinionet rreth kësaj pije të preferuar kanë ndryshuar disa herë: dikur kafeja konsiderohej një ves i pashëndetshëm, një herë tjetër ishte e mirë për shëndetin. Tani, Shoqata Amerikane e Zemrës (AHA) e ka rivlerësuar situatën – veçanërisht kur bëhet fjalë për shëndetin e zemrës.
Kafeja dhe rreziku për zemrën dhe enët e gjakut
Sipas analizës së shoqatës, për shumicën e të rriturve të shëndetshëm, konsumi i moderuar i kafesë deri në 400 miligramë kafeinë nuk është vetëm i padëmshëm, por redukton madje rrezikun e sëmundjeve të zemrës dhe të enëve të gjakut.
Sipas llogaritjes së AHA-së, kjo korrespondon me tre deri në pesë filxhanë kafe të zezë me filtrim prej afërsisht 240 mililitrash. Por numri i filxhanëve është vetëm një vlerë e përafërt: Agjencia Evropiane e Sigurisë Ushqimore (EFSA) llogarit afërsisht 90 miligramë kafeinë për 200 mililitra kafe me filtrim dhe afërsisht 80 miligramë për 60 mililitra kafe ekspreso.
Një analizë e një baze të dhënash shëndetësore nga viti 2023 nga Britania e Madhe me pothuajse 450,000 njerëz arriti në rezultate të ngjashme. Edhe EFSA konsideron deri në 400 miligramë kafeinë në ditë si një sasi të sigurt për të rriturit e shëndetshëm.
Konsumi i kafesë tek gratë shtatzëna
Për gratë shtatzëna, EFSA këshillon një kufi më të ulët prej 200 miligramësh në ditë. Ndërsa për njerëzit me sëmundje të mëparshme, vlen sa vijon: sëmundjet, ilaçet dhe reagimet individuale ndaj kafeinës mund të kërkojnë vlerësim mjekësor.
Trupi mund të përshtatet me konsumin e kafesë
Kafeina mund të rrisë rrahjet e zemrës dhe presionin e gjakut në afat të shkurtër dhe të shkaktojë rrahje më të shpejtë të zemrë, apo shqetësim tek njerëzit që e konsumojnë shumë. Por hulumtimet afatgjata tregojnë një pamje të ndryshme, thotë Omar Hahad nga Qendra e Kardiologjisë e Mjekësisë Universitare në Mainz, Gjermani.
Ai shpjegon se trupi mund të përshtatet me konsumin e rregullt, kështu që edhe ato efekte afatshkurtra bëhen më të buta. Mesatarisht, kafeja ndoshta sjell edhe përfitime për zemrën dhe enët e gjakut, përmbledh ai.
Këtu është e rëndësishme: shumë të dhëna afatgjata vijnë nga studime vëzhguese. Ato gjithmonë mund të tregojnë vetëm lidhje, por kurrë marrëdhënien shkak-pasojë.
Prandaj Gregory Marcus, kreu i grupit të autorëve të raportit të AHA-së, paralajmëron se kafeja nuk duhet të kuptohet si një recetë për një jetë të gjatë dhe të shëndetshme të zemrës: nuk ka një rekomandim të vetëm për të gjithë, shpjegon ai.
“Mënyra se si përpunohet kafeja është shumë e ndryshme nga personi në person. Kjo është arsyeja pse duhet ta dëgjoni trupin tuaj: nëse e toleroni mirë një filxhan, nuk duhet ta detyroni veten të pini tre.”
Sipas udhëzimeve aktuale të SHBA-së, fibrilacioni atrial nuk është një arsye për të shmangur kafenë në përgjithësi, pasi sasitë e zakonshme të kafeinës nuk e rrisin rrezikun mesatarisht. Por ka të dhëna se kafeja mund të shtojë rrahjet e zemrës. Kjo është arsyeja pse kushdo që vëren çrregullime të ritmit të zemrës pas kafesë duhet të zvogëlojë konsumin e saj dhe të flasë me një mjek për këtë.
Një filxhan kafe në mëngjes
Edhe koha e konsumimit mund të luajë një rol tek shëndeti: Një studim i botuar në vitin 2025 që përfshinte më shumë se 40,000 të rritur amerikanë gjeti një lidhje me vdekshmëri më të ulët të përgjithshme dhe të sëmundjeve kardiovaskulare, veçanërisht midis njerëzve që pinin kafe në mëngjes.
Por nuk është vetëm kafeina në kafe që e bën pijen e zgjimit në mëngjes kaq interesante për hulumtime. “Kafeja është në të vërtetë një pije shumë komplekse”, thotë Hahad. Kafeja përmban qindra substanca, duke përfshirë substanca dytësore bimore, aroma, substanca pjekjeje dhe vajra kafeje. Kafeina ndoshta nuk është përgjegjëse vetëm për përfitimet shëndetësore të vëzhguara, sipas Hahad.
Rrezik më i ulët i diabetit
“Në shumë studime është vërejtur se njerëzit që pinë kafe rregullisht kanë një rrezik të vogël të zhvillimit të diabetit të tipit 2 – krahasuar me njerëzit që pinë kafe shumë rrallë ose aspak”, thotë Matthias Schulze nga Instituti Gjerman i Kërkimeve të Ushqyerjes Potsdam-Rehbrücke.
Kjo lidhje u vu re edhe me kafenë pa kafeinë – krahasuar me njerëzit që nuk pinin kafe, rreziku i diabetit me gjashtë filxhanë në ditë ishte statistikisht rreth 33 përqind më i ulët.
“Kjo do të thotë se ndoshta nuk është kafeina që vepron këtu, por komponentë të tjerë që janë të paktën po aq të rëndësishëm”, thotë Schulze. Acidet klorogjenike dhe substancat e tjera bimore po hetohen si një shpjegim i mundshëm për këtë efekt.
Mbetjet e pesticideve në kafe
Kohët e fundit, raportet për pesticidet në kafe kanë shkaktuar pasiguri. Jens Schubert nga Instituti Federal Gjerman për Vlerësimin e Rrezikut (BfR) shpjegon: “Vetëm zbulimi i agjentëve të caktuar mbrojtës të bimëve në kokrrën e kafesë nuk është i njëjtë me ‘është e rrezikshme’ ose ‘është toksike për konsumatorin’. Tek vlerësimet, rreziku që një substancë mund të paraqesë vërehet në varësi të sasisë së gëlltitur nga konsumatori.”
Bazuar në të dhënat e disponueshme, nuk ka rrezik të njohur për konsumatorët nga kafeja, thotë Schubert.
Rreth dy deri në tre përqind e mostrave të kafesë së papërpunuar të testuara tejkaluan kufijtë e vlerave, raportoi Schubert. Por edhe kjo nuk do të thotë automatikisht se produktet janë të dëmshme për shëndetin. Pavarësisht kësaj, si rregull, këto mallra tërhiqen nga qarkullimi.
Kafeja është kënaqësi, jo ilaç
Sipas hulumtimeve aktuale, për shumicën e të rriturve të shëndetshëm, nuk ka asgjë kundër konsumit të moderuar të kafesë me deri në 400 miligramë kafeinë në ditë.
Por nga kjo nuk mund të konkludohet se duhet të fillohet pirja e kafesë “në mënyrë parandaluese” në mënyrë që të qëndrohet i shëndetshëm për më gjatë. Hahad e shpreh kështu: “Për shumicën e njerëzve, kafeja është ndoshta kryesisht një mjet kënaqësie, jo një ilaç apo një shtesë dietike.”
Prandaj, kafeja mund të përshtatet mirë në një stil jetese të shëndetshëm, por nuk zëvendëson gjumin, një dietë të ekuilibruar dhe aktivitetin fizik./ DW
Në protestën e 80 kundër qeverisë, shqiptarët shprehet se janë të vendosur dhe se revolta do të vijojë deri në largimin e Ramës.
Në marshimin në kryeqytet, kanë vijuar me thirrjet “Rama në burg, Berisha në burg”. Ndërsa kanë kaluar pranë selisë së PD, kanë jehuar thirrjet “Opozitë e shitur”.
Protestuesit shprehen se revolta do të vijojë në ditën në vazhdim deri në largimin e Ramës dhe qeverisë së tij.
Rezoluta, e cila mban firmën e kryeparlamentarit Niko Peleshi, i ka shkuar SPAK dhe i kërkohet që brenda 23 gushtit të hartojë një plan veprimi për zbatimin e 32 rekomandimeve të vitit 2026. Kuvendi i thekson Strukturës së Posaçme kundër Korrupsionit dhe Krimit të Organizuar që të rishikojë praktikën e masave të sigurimit personal, duke rritur përdorimin e masave alternative në përputhje me standardet europiane të të drejtave të njeriut.
“Kuvendi rekomandon për vitin 2026 analizimin çdo 4 muaj të kohëzgjatjes së paraburgimit dhe raportit të tij me dënimet përfundimtare, me qëllim evidentimin e rasteve kur koha e qëndrimit në paraburgim afrohet ose mbulon në mënyrë substanciale dënimin përfundimtar, si dhe marrjen e masave për shmangien e kësaj praktike”, theksohet në Rezolutën e Rekomandimeve të Kuvend-it për SPAK-un.
Më tej, vlerësohet e nevojshme reduktimi i stokut të çështjeve të mbartura dhe përmirësimi i dosjeve të dërguara për gjykim mbi të gjitha në lidhje me standardet e provueshmërisë.
Në dokument renditet me rëndësi edhe forcimi i kapaciteteve për hetime financiare dhe pasurore paralele. Kuvendi i rekomandon SPAK-ut rritjen e fokusit në konfiskimin e pasurive në çështjet e korrupsionit, veçanërisht në nivelet e larta të administratës publike, me qëllim që ndjekja penale të mos kufizohet vetëm në përgjegjësinë individuale, por të prodhojë edhe goditje reale të përfitimit ekonomik të paligjshëm.
“Kuvendi rekomandon për vitin 2026 zhvillimin e analizave periodike për efektivitetin e ndjekjes penale në çështjet ku përfshihen zyrtarë dhe ish-zyrtarë të lartë, përfshirë jo vetëm numrin e procedimeve dhe personave të dërguar në gjykatë, por edhe shkallën e konfiskimit të pasurive. Vijimin e konsolidimit të rezultateve në hetimin dhe ndjekjen penale të çështjeve të korrupsionit dhe krimit të organizuar, me synim rritjen e numrit të procedimeve që përfundojnë me vendime gjyqësore të formës së prerë, me fokus të posaçëm te korrupsioni i nivelit të lartë, pastrimi i parave, trafikimi i narkotikëve dhe veprat penale të kryera në kuadër të grupeve të strukturuara kriminale”, theksohet në Rezolutën e Rekomandimeve të Kuvend-it për SPAK-un.
Kuvendi sugjeron edhe përshpejtimin e rekrutimit të hetuesve financiarë e të BKH-së dhe të oficerëve të policisë gjyqësore, duke shpërndarë në mënyrë të balancuar ngarkesën e punës. Porosi i lihet edhe për thellimin e bashkëpunimit ndërkombëtar si dhe përparimin e Sistemit Elektronik të Menaxhimit të Çështjeve, për të forcuar transparencën me raportim statistikor në kohë reale.
Në listën e rekomandimeve, ndër të tjera Kuvendi udhëzon Strukturën e Posaçme kundër Korrupsionit që të analizojë në përputhje me rekomandimin e BE-së, nevojën për rishikim të rregullave dhe procedurave lidhur me procesin e emërimit të Drejtorit të Byrosë Kombëtare të Hetimit, për të qartësuar dhe garantuar procese të hapura, konkurruese dhe pa vonesa.
